raushni se tirgi tabir kar di jaegi

raushnī se tīrgī ta.abīr kar dī jā.egī

rañg se mahrūm har tasvīr kar dī jā.egī

adl ke me.aar meñ aa jā.eñgī tabdīliyāñ

be-gunāhī lā.eq-e-tāzīr kar dī jā.egī

har nazar ko ārzūoñ kā samundar baḳhsh kar

har zabāñ par tishnagī tahrīr kar dī jā.egī

dab ke rah jā.eñge jazboñ ke ujāle ek din

zulmat-e-iflās ālamgīr kar dī jā.egī

har kalā.ī har tamannā har haqīqat har vafā

āshnā-e-halqa-e-zanjīr kar dī jā.egī

bāñjh ho kar rah gayā jis vaqt dhartī kā badan

tab hamāre naam ye jāgīr kar dī jā.egī

dafn kar ke is kī buniyādoñ meñ insānoñ ke sar

ik mohazzab shahr kī ta.amīr kar dī jā.egī

raushni se tirgi tabir kar di jaegi

rang se mahrum har taswir kar di jaegi

adl ke mear mein aa jaengi tabdiliyan

be-gunahi laeq-e-tazir kar di jaegi

har nazar ko aarzuon ka samundar baKHsh kar

har zaban par tishnagi tahrir kar di jaegi

dab ke rah jaenge jazbon ke ujale ek din

zulmat-e-iflas aalamgir kar di jaegi

har kalai har tamanna har haqiqat har wafa

aashna-e-halqa-e-zanjir kar di jaegi

banjh ho kar rah gaya jis waqt dharti ka badan

tab hamare nam ye jagir kar di jaegi

dafn kar ke is ki buniyaadon mein insanon ke sar

ek mohazzab shahr ki tamir kar di jaegi