ret pe naqsh banate hue thak jate hain

ret pe naqsh banāte hue thak jaate haiñ

ḳhvāb āñkhoñ meñ sajāte hue thak jaate haiñ

yuuñ hī qabroñ meñ nahīñ so.e thake haare badan

log duniyā se nibhāte hue thak jaate haiñ

zindagī pyaas kā sahrā hai jahāñ qaid haiñ ham

aur ham pyaas bujhāte hue thak jaate haiñ

mehrbāñ koī nahīñ shahr meñ ik tere sivā

yuuñ to ham haath milāte hue thak jaate haiñ

chhoḌ jaate haiñ vahī log kaḌe vaqt meñ kyoñ

ham jinheñ apnā batāte hue thak jaate haiñ

Daste rahte haiñ ka.ī log yahāñ sāñp-mizāj

aur ham zaḳhm chhupāte hue thak jaate haiñ

lauT aao na kisī roz ai jaane vaalo

ham ġham-e-hijr chhupāte hue thak jaate haiñ

un ke sīnoñ meñ bhī hote haiñ talātum ġham ke

vo jo auroñ ko hañsāte hue thak jaate haiñ

zindagī aur tirā qarz chukā.eñ kab tak

ab to ham sher sunāte hue thak jaate haiñ

ret pe naqsh banate hue thak jate hain

KHwab aankhon mein sajate hue thak jate hain

yun hi qabron mein nahin soe thake haare badan

log duniya se nibhate hue thak jate hain

zindagi pyas ka sahra hai jahan qaid hain hum

aur hum pyas bujhate hue thak jate hain

mehrban koi nahin shahr mein ek tere siwa

yun to hum hath milate hue thak jate hain

chhoD jate hain wahi log kaDe waqt mein kyon

hum jinhen apna batate hue thak jate hain

Daste rahte hain kai log yahan sanp-mizaj

aur hum zaKHm chhupate hue thak jate hain

lauT aao na kisi roz ai jaane walo

hum gham-e-hijr chhupate hue thak jate hain

un ke sinon mein bhi hote hain talatum gham ke

wo jo auron ko hansate hue thak jate hain

zindagi aur tera qarz chukaen kab tak

ab to hum sher sunate hue thak jate hain