rishte-nate kho gae sab ganw ka ghar kho gaya

rishte-nāte kho ga.e sab gaañv kā ghar kho gayā

rail kī siiTī bajī aur saarā manzar kho gayā

chalte phirte log saḌkeñ zindagī āvārgī

har nazāra ek din dil se nikal kar kho gayā

raat maiñ ne ḳhvāb dekhā ḳhvāb kī ta.abīr bhī

ik parinda chhat pe baiThā aur uḌ kar kho gayā

kuchh nahīñ ab aa.ine meñ saaf dhuñdlā kuchh nahīñ

aks kī āñkhoñ meñ jo hotā thā tevar kho gayā

un sabhī hairān bachchoñ kī tarah haiñ ham 'qamar'

vaqt ke is mele meñ jin kā muqaddar kho gayā

kho ga.e is baar mere ḳhvāb saare dhund meñ

aur ab ke ret meñ ye merā bistar kho gayā

rishte-nate kho gae sab ganw ka ghar kho gaya

rail ki siTi baji aur sara manzar kho gaya

chalte phirte log saDken zindagi aawargi

har nazara ek din dil se nikal kar kho gaya

raat main ne KHwab dekha KHwab ki tabir bhi

ek parinda chhat pe baiTha aur uD kar kho gaya

kuchh nahin ab aaine mein saf dhundla kuchh nahin

aks ki aankhon mein jo hota tha tewar kho gaya

un sabhi hairan bachchon ki tarah hain hum 'qamar'

waqt ke is mele mein jin ka muqaddar kho gaya

kho gae is bar mere KHwab sare dhund mein

aur ab ke ret mein ye mera bistar kho gaya