rishton ko jab dhup dikhai jati hai

rishtoñ ko jab dhuup dikhā.ī jaatī hai

cigarette se cigarette sulgā.ī jaatī hai

jism hamārā ik aisī mil hai jis meñ

añdhiyāroñ se dhuup banā.ī jaatī hai

nā se us kī shakl milāne lagtā huuñ

jab us kī āvāz sunā.ī jaatī hai

kyā vo panne sach-much kore hote haiñ

jin par koī zarb lagā.ī jaatī hai

bulle-bābā dīvānoñ ko samjhāo

apnī hastī kaam meñ laa.ī jaatī hai

apnī miTTī apnā paanī vāpas le

sunte haiñ ye shai lauTā.ī jaatī hai

patthar le kar aate haiñ sab siine meñ

bhaag jage to Thokar khaa.ī jaatī hai

ḳhāmoshī se yakjā karte haiñ ḳhud ko

shor machā kar aag bujhā.ī jaatī hai

hote hote raushan hotā hai chehra

jaate jaate dil se kaa.ī jaatī hai

donoñ bhavoñ kī shikneñ haath baTātī haiñ

apnī tīsrī aañkh banā.ī jaatī hai

rishton ko jab dhup dikhai jati hai

cigarette se cigarette sulgai jati hai

jism hamara ek aisi mil hai jis mein

andhiyaron se dhup banai jati hai

na se us ki shakl milane lagta hun

jab us ki aawaz sunai jati hai

kya wo panne sach-much kore hote hain

jin par koi zarb lagai jati hai

bulle-baba diwanon ko samjhao

apni hasti kaam mein lai jati hai

apni miTTi apna pani wapas le

sunte hain ye shai lauTai jati hai

patthar le kar aate hain sab sine mein

bhag jage to Thokar khai jati hai

KHamoshi se yakja karte hain KHud ko

shor macha kar aag bujhai jati hai

hote hote raushan hota hai chehra

jate jate dil se kai jati hai

donon bhawon ki shiknen hath baTati hain

apni tisri aankh banai jati hai