roenge chashm-e-tar na dekhenge

ro.eñge chashm-e-tar na dekheñge

ḳhvāb vo umr bhar na dekheñge

fat.h kā ḳhvāb dekhne vaale

apne shānoñ pe sar na dekheñge

ham savālī nikal paḌe ghar se

koī darvāza dar na dekheñge

dhuup kā sā.ebāñ saroñ par hai

raah meñ ham shajar na dekheñge

chaah kar bhī tujhe na chāheñge

dekh kar bhī magar na dekheñge

pastiyoñ se bulandiyāñ kam haiñ

ham ye zer-o-zabar bhī dekheñge

shauq-e-dīdār hai 'jamīl' ahmad

ham tire bām-o-dar na dekheñge

roenge chashm-e-tar na dekhenge

KHwab wo umr bhar na dekhenge

fath ka KHwab dekhne wale

apne shanon pe sar na dekhenge

hum sawali nikal paDe ghar se

koi darwaza dar na dekhenge

dhup ka saeban saron par hai

rah mein hum shajar na dekhenge

chah kar bhi tujhe na chahenge

dekh kar bhi magar na dekhenge

pastiyon se bulandiyan kam hain

hum ye zer-o-zabar bhi dekhenge

shauq-e-didar hai 'jamil' ahmad

hum tere baam-o-dar na dekhenge