rote rote os boli mera chehra dekh kar

rote rote os bolī merā chehra dekh kar

tum batāo kyā milā hai ḳhvāb us kā dekh kar

ik shikārī kā vo bachcha haa.e vo nanhā sā phuul

maiñ qafas meñ lauT aayā dasht saarā dekh kar

intihā.ī dhuup se bhī ik qadam aage kī dhuup

aah ye bhī bujh rahī hai merā saayā dekh kar

Thaharnā to zaat kā thā us pe ye bechain jism

chāñd taare ro paḌe haiñ bahtā dariyā dekh kar

dūsrī duniyā se bachne ke liye piite haiñ ham

ham bahut uktā ga.e haiñ ek duniyā dekh kar

rote rote os boli mera chehra dekh kar

tum batao kya mila hai KHwab us ka dekh kar

ek shikari ka wo bachcha hae wo nanha sa phul

main qafas mein lauT aaya dasht sara dekh kar

intihai dhup se bhi ek qadam aage ki dhup

aah ye bhi bujh rahi hai mera saya dekh kar

Thaharna to zat ka tha us pe ye bechain jism

chand tare ro paDe hain bahta dariya dekh kar

dusri duniya se bachne ke liye pite hain hum

hum bahut ukta gae hain ek duniya dekh kar