roz-e-azal ho ya abad donon hain ham-kanar-e-ishq

roz-e-azal ho yā abad donoñ haiñ ham-kanār-e-ishq

ishq hai rāz-dār-e-husn husn hai rāzdār-e-ishq

ḳhushbū-e-husn-o-ishq se mahke hue haiñ bām-o-dar

saarā jahāñ bahār-e-husn saarā jahāñ bahār-e-ishq

hotā hai kaun kāmrāñ ma.arka-e-hayāt meñ

un ko hai e'timād-e-husn ham ko hai etibār-e-ishq

uTTho harīm-e-nāz se sote rahoge kab talak

phailī huī hai har taraf raushnī-e-bahār-e-ishq

donoñ kī manzileñ bhī ek donoñ kī rahguzar bhī ek

ishq huā nisār-e-husn husn huā nisār-e-ishq

ab to ḳhudā ke vāste ruḳh se naqāb uThā.iye

aap ke intizār meñ hai dil-e-be-qarār-e-ishq

roz-e-azal ho ya abad donon hain ham-kanar-e-ishq

ishq hai raaz-dar-e-husn husn hai raazdar-e-ishq

KHushbu-e-husn-o-ishq se mahke hue hain baam-o-dar

sara jahan bahaar-e-husn sara jahan bahaar-e-ishq

hota hai kaun kaamran marka-e-hayat mein

un ko hai e'timad-e-husn hum ko hai etibar-e-ishq

uTTho harim-e-naz se sote rahoge kab talak

phaili hui hai har taraf raushni-e-bahaar-e-ishq

donon ki manzilen bhi ek donon ki rahguzar bhi ek

ishq hua nisar-e-husn husn hua nisar-e-ishq

ab to KHuda ke waste ruKH se naqab uThaiye

aap ke intizar mein hai dil-e-be-qarar-e-ishq