roz kaTte hain yahan hath kamane wale

roz kaTte haiñ yahāñ haath kamāne vaale

jiine dete nahīñ muflis ko zamāne vaale

apnā nafrat kī siyāsat se ta'alluq hī nahīñ

ham haiñ dam toḌtī qadroñ ko bachāne vaale

bāñTte haiñ jo zamīnoñ ko koī aur haiñ vo

ham nahīñ sahn meñ dīvār uThāne vaale

āḳhir ik din unheñ tazlīl to sahnā hogī

jo haiñ kam-zarf kā ehsān uThāne vaale

vā'da-e-'ishq nibhāne nahīñ aate us ko

vahī andāz haiñ us ke bhī zamāne vaale

dekhnā kal isī dhartī se numū pā.eñge

muflisoñ ke liye āvāz uThāne vaale

yaar yāroñ ke liye jaan luTāte the 'umair'

ab kahāñ log ta'alluq ko nibhāne vaale

roz kaTte hain yahan hath kamane wale

jine dete nahin muflis ko zamane wale

apna nafrat ki siyasat se ta'alluq hi nahin

hum hain dam toDti qadron ko bachane wale

banTte hain jo zaminon ko koi aur hain wo

hum nahin sahn mein diwar uThane wale

aaKHir ek din unhen tazlil to sahna hogi

jo hain kam-zarf ka ehsan uThane wale

wa'da-e-'ishq nibhane nahin aate us ko

wahi andaz hain us ke bhi zamane wale

dekhna kal isi dharti se numu paenge

muflison ke liye aawaz uThane wale

yar yaron ke liye jaan luTate the 'umair'

ab kahan log ta'alluq ko nibhane wale