roz nae kartab dikhlae jadugar

roz na.e kartab dikhlā.e jādūgar

duniyā kā matlab samjhā.e jādūgar

tum kahte ho har dam hañstā rahtā hai

aañsū par paivand lagā.e jādūgar

dekh ke us ko yuuñ saare taalī piiTe

ūñchā.ī se jab gir jaa.e jādūgar

baaqī to paanī se aag bujhāte haiñ

aur paanī meñ aag lagā.e jādūgar

saare darzī kapḌe kaaTā karte haiñ

insāñ ke TukḌe kar jaa.e jādūgar

log yahāñ chiñgārī se Dar jaate haiñ

apne muñh se aag uḌaa.e jādūgar

likhnā to alfāz kī herā-pherī hai

ḳhud ko ab 'irfān' batā.e jādūgar

roz nae kartab dikhlae jadugar

duniya ka matlab samjhae jadugar

tum kahte ho har dam hansta rahta hai

aansu par paiwand lagae jadugar

dekh ke us ko yun sare tali piTe

unchai se jab gir jae jadugar

baqi to pani se aag bujhate hain

aur pani mein aag lagae jadugar

sare darzi kapDe kaTa karte hain

insan ke TukDe kar jae jadugar

log yahan chingari se Dar jate hain

apne munh se aag uDae jadugar

likhna to alfaz ki hera-pheri hai

KHud ko ab 'irfan' batae jadugar