roz-o-shab aur nae arz-o-sama mange hai

roz-o-shab aur na.e arz-o-samā māñge hai

aaj kā daur na.ī āb-o-havā māñge hai

apnī bechārgī kī yuuñ to hai ehsās bahut

phir bhī dil tujh se vahī ahd-e-vafā māñge hai

dhuup meñ jhulsī huī shāḳh pe afsurda kalī

phuul banñe ke liye dast-e-sabā māñge hai

har koī yuuñ to hai bar-gashta-e-hālāt magar

har koī jiine kī har lahza duā māñge hai

aah vo vālid-e-be-zar kī javāñ beTī ke

suune hāthoñ ke liye rañg-e-hinā māñge hai

ye na.e taur ye andāz mujhe raas nahīñ

merī tahzīb vahī sharm-o-hayā māñge hai

saiñkaḌoñ ne.amatoñ se us ne navāzā hai tujhe

aur ab 'chāñd' tū allāh se kyā māñge hai

roz-o-shab aur nae arz-o-sama mange hai

aaj ka daur nai aab-o-hawa mange hai

apni bechaargi ki yun to hai ehsas bahut

phir bhi dil tujh se wahi ahd-e-wafa mange hai

dhup mein jhulsi hui shaKH pe afsurda kali

phul banne ke liye dast-e-saba mange hai

har koi yun to hai bar-gashta-e-haalat magar

har koi jine ki har lahza dua mange hai

aah wo walid-e-be-zar ki jawan beTi ke

sune hathon ke liye rang-e-hina mange hai

ye nae taur ye andaz mujhe ras nahin

meri tahzib wahi sharm-o-haya mange hai

sainkaDon neamaton se us ne nawaza hai tujhe

aur ab 'chand' tu allah se kya mange hai