ruKH har ek tir-e-nazar ka hai mere dil ki taraf

ruḳh har ik tīr-e-nazar kā hai mire dil kī taraf

aane vaale aa rahe haiñ apnī manzil kī taraf

Dūbne vaale kī māyūsī pe dil tharrā gayā

kis nigāh-e-yās se dekhā thā sāhil kī taraf

sach hai ik ujḌī huī duniyā ke kyā lail-o-nahār

tum se bhī ab to na dekhā jā.egā dil kī taraf

kis fasurda-ḳhātirī se rāt-bhar jaltī rahī

der tak dekhā kiye ham sham-e-mahfil kī taraf

apnī marzī se nahīñ apne irāde se nahīñ

har musāfir ke qadam uThte haiñ manzil kī taraf

tum ko kyā mālūm kyā bantī hai dil par ishq meñ

aa.ina le kar zarā dekho muqābil kī taraf

ho gayā 'maḳhmūr' rāz-e-zindagī kā inkishāf

mauj aatī hai fanā hone ko sāhil kī taraf

ruKH har ek tir-e-nazar ka hai mere dil ki taraf

aane wale aa rahe hain apni manzil ki taraf

Dubne wale ki mayusi pe dil tharra gaya

kis nigah-e-yas se dekha tha sahil ki taraf

sach hai ek ujDi hui duniya ke kya lail-o-nahaar

tum se bhi ab to na dekha jaega dil ki taraf

kis fasurda-KHatiri se raat-bhar jalti rahi

der tak dekha kiye hum sham-e-mahfil ki taraf

apni marzi se nahin apne irade se nahin

har musafir ke qadam uThte hain manzil ki taraf

tum ko kya malum kya banti hai dil par ishq mein

aaina le kar zara dekho muqabil ki taraf

ho gaya 'maKHmur' raaz-e-zindagi ka inkishaf

mauj aati hai fana hone ko sahil ki taraf