ruKH hawa ka ye ki jaise usko aasani paDe

ruḳh havā kā ye ki jaise us ko āsānī paḌe

dil kī aag aisī ki ham ko roz sulgānī paḌe

nuur ho andar to bāhar maat kyuuñ khānī paḌe

vo tajallī kyā miyāñ jo tuur se laanī paḌe

zindagī kī qadr tab tum par khulegī dosto

us ke kūche se jab ek ik saañs mañgvānī paḌe

ek to mushkil ko jhelūñ aur uupar se ye hai

apnī mushkil roz us ko jā ke samjhānī paḌe

ḳhud vo milne aa.e to haa.el rahe ye be-ḳhudī

maiñ jo milne jā.ūñ to raste meñ hairānī paḌe

paḌ gayā jab tū hī īn-o-āñ kī uljhan meñ 'shujā.a'

laakh phir sajde meñ shab bhar terī peshānī paḌe

ruKH hawa ka ye ki jaise us ko aasani paDe

dil ki aag aisi ki hum ko roz sulgani paDe

nur ho andar to bahar mat kyun khani paDe

wo tajalli kya miyan jo tur se lani paDe

zindagi ki qadr tab tum par khulegi dosto

us ke kuche se jab ek ek sans mangwani paDe

ek to mushkil ko jhelun aur upar se ye hai

apni mushkil roz us ko ja ke samjhani paDe

KHud wo milne aae to hael rahe ye be-KHudi

main jo milne jaun to raste mein hairani paDe

paD gaya jab tu hi in-o-an ki uljhan mein 'shujaa'

lakh phir sajde mein shab bhar teri peshani paDe