ruKH pari chashm pari zulf pari aan pari

ruḳh parī chashm parī zulf parī aan parī

kyuuñ na ab nām-e-ḳhudā ho tire qurbān parī

jhamke jhamke vo surayyā ke kiran phuul vo phuul

bunde baale parī motī parī aur kaan parī

rashk-e-ḳhurshīd jabīñ abr-e-siyah sī paTTī

lahr choTī kī ġhazab zulf-e-pareshān parī

husn gulzār qamar shakl surāhī gardan

mah-jabīñ seb-e-zaqan chāh-e-zanaḳhdān parī

maar ġhamza kī balā tīr-e-nigah dast-e-sināñ

teġh-e-abrū kī sitam tarkash-e-mizhgān parī

muskurāne kī adā jaise chamak bijlī kī

aan hañsne kī qayāmat lab-o-dandān parī

aañkh mastī kī bharī shoḳh nigāheñ chanchal

qahr kājal kī khachāvaT misī o paan parī

benī aur nath kā vo aalam ki chhide dil jis se

huur chunnī kī jhalak gauhar-e-ġhaltān parī

dhukdhukī chāñd sī jugnū bhī sitāroñ kī misāl

itr-dāñ turfa vo toḌe bhī daraḳhshān parī

chaak siine kā ġhazab saaf badan motī sā

ek tasvīr sī kurtī kā garebān parī

pusht gul-barg shikam siim kamar tār-e-nigāh

sān-e-billor gulāvaT meñ har ik raan parī

gherā pashvāz kā vo jis ke kanārī qurbāñ

chaal aafat kī nishāñ jumbish-e-dāmān parī

kyā kahūñ us ke sarāpā kī maiñ tārīf 'nazīr'

qad parī dhaj parī aalam parī aur shaan parī

ruKH pari chashm pari zulf pari aan pari

kyun na ab nam-e-KHuda ho tere qurban pari

jhamke jhamke wo surayya ke kiran phul wo phul

bunde baale pari moti pari aur kan pari

rashk-e-KHurshid jabin abr-e-siyah si paTTi

lahr choTi ki ghazab zulf-e-pareshan pari

husn gulzar qamar shakl surahi gardan

mah-jabin seb-e-zaqan chah-e-zanaKHdan pari

mar ghamza ki bala tir-e-nigah dast-e-sinan

tegh-e-abru ki sitam tarkash-e-mizhgan pari

muskurane ki ada jaise chamak bijli ki

aan hansne ki qayamat lab-o-dandan pari

aankh masti ki bhari shoKH nigahen chanchal

qahr kajal ki khachawaT misi o pan pari

beni aur nath ka wo aalam ki chhide dil jis se

hur chunni ki jhalak gauhar-e-ghaltan pari

dhukdhuki chand si jugnu bhi sitaron ki misal

itr-dan turfa wo toDe bhi daraKHshan pari

chaak sine ka ghazab saf badan moti sa

ek taswir si kurti ka gareban pari

pusht gul-barg shikam sim kamar tar-e-nigah

san-e-billor gulawaT mein har ek ran pari

ghera pashwaz ka wo jis ke kanari qurban

chaal aafat ki nishan jumbish-e-daman pari

kya kahun us ke sarapa ki main tarif 'nazir'

qad pari dhaj pari aalam pari aur shan pari