ruKH se tere ayan hai kisi ka lahu shafaq

ruḳh se tire ayaañ hai kisī kā lahū shafaq

hāzir hai dekh ā.ina-e-ābjū shafaq

ā.īna-dār-e-partav-e-tasvīr-e-nāz haiñ

ye kahkashāñ ye qaus-e-quzah surḳh-rū shafaq

be-nūr shai ko nuur ghaḌī bhar to de ga.ī

aflāk par mudām rahe surḳh-rū shafaq

ḳhūn-e-shahīd-e-nāz kī tash.hīr kar ga.ī

kis ne kahā ye aag lagā chār-sū shafaq

paate hī rang chaḌh gayā aflāk par dimāġh

achchhā huā ki rah ga.ī muhtāj-e-bū shafaq

dhoyā kisī ne dast-e-hinā.ī ġhalat ġhalat

farmā chukī hai ġhusl sar-e-āb-jū shafaq

aks-e-shabīh-e-nāz 'musavvir' dikhā to de

barsoñ se kar rahī hai yahī aarzū shafaq

ruKH se tere ayan hai kisi ka lahu shafaq

hazir hai dekh aaina-e-abju shafaq

aaina-dar-e-partaw-e-taswir-e-naz hain

ye kahkashan ye qaus-e-quzah surKH-ru shafaq

be-nur shai ko nur ghaDi bhar to de gai

aflak par mudam rahe surKH-ru shafaq

KHun-e-shahid-e-naz ki tashhir kar gai

kis ne kaha ye aag laga chaar-su shafaq

pate hi rang chaDh gaya aflak par dimagh

achchha hua ki rah gai muhtaj-e-bu shafaq

dhoya kisi ne dast-e-hinai ghalat ghalat

farma chuki hai ghusl sar-e-ab-ju shafaq

aks-e-shabih-e-naz 'musawwir' dikha to de

barson se kar rahi hai yahi aarzu shafaq