ruKHsat hui bahaar nazare chale gae

ruḳhsat huī bahār nazāre chale ga.e

dāman tirā chhinā ki sahāre chale ga.e

aaya na lab pe harf-e-shikāyat bhī bhuul ke

jaise bhī apnī guzrī guzāre chale ga.e

sab kuchh luTāyā phir bhī tujhe pā sake na ham

baazī har ek gaam pe haare chale ga.e

siine meñ soz aañkh meñ aañsū liye hue

mahfil se terī dard ke maare chale ga.e

hañs hañs ke ham ne zulm sahe haiñ tire liye

mar mar ke bhī tujhī ko pukāre chale ga.e

maujoñ se ai 'tabassum' abhī aur khel le

kashtī se terī duur kināre chale ga.e

ruKHsat hui bahaar nazare chale gae

daman tera chhina ki sahaare chale gae

aaya na lab pe harf-e-shikayat bhi bhul ke

jaise bhi apni guzri guzare chale gae

sab kuchh luTaya phir bhi tujhe pa sake na hum

bazi har ek gam pe haare chale gae

sine mein soz aankh mein aansu liye hue

mahfil se teri dard ke mare chale gae

hans hans ke hum ne zulm sahe hain tere liye

mar mar ke bhi tujhi ko pukare chale gae

maujon se ai 'tabassum' abhi aur khel le

kashti se teri dur kinare chale gae