ruswa kiya shuur ko danai chhin li

rusvā kiyā shu'ūr ko dānā.ī chhīn lī

jehl-e-ḳhirad ne āñkhoñ se bīnā.ī chhīn lī

sāñsoñ meñ gūñjtī huī shahnā.ī chhīn lī

shahroñ ne mujh se gaañv kī purvā.ī chhīn lī

is tarah bhī badalte haiñ nazroñ ke zāviye

ḳhud ḳhvāb hī ne ḳhvāb kī ra.anā.ī chhīn lī

rūhoñ kī muflisī ne bahar-hāl ek din

chehra-ā.inoñ se ḳhū-e-shanāsā.ī chhīn lī

hoñT ā.inoñ ke yūñhī nahīñ haiñ sile hue

arzānī-e-jamāl ne goyā.ī chhīn lī

fitrat kā ye tazād ajīb-o-ġharīb hai

tanhā.ī dene vaale ne tanhā.ī chhīn lī

ruswa kiya shu'ur ko danai chhin li

jehl-e-KHirad ne aankhon se binai chhin li

sanson mein gunjti hui shahnai chhin li

shahron ne mujh se ganw ki purwai chhin li

is tarah bhi badalte hain nazron ke zawiye

KHud KHwab hi ne KHwab ki ranai chhin li

ruhon ki muflisi ne bahar-haal ek din

chehra-ainon se KHu-e-shanasai chhin li

honT aainon ke yunhi nahin hain sile hue

arzani-e-jamal ne goyai chhin li

fitrat ka ye tazad ajib-o-gharib hai

tanhai dene wale ne tanhai chhin li