rutba kuchh aashiqi mein na kam hai faqir ka

rutba kuchh āshiqī meñ na kam hai faqīr kā

haiñ jis ke sab sanam vo sanam hai faqīr kā

takiya ise na bhuul ke kahnā kabhī miyāñ

takiya nahīñ ye bāġh-e-iram hai faqīr kā

rahtā hai phir vo phūltā misl-e-sadā suhāg

jis gul-badan pe lutf-o-karam hai faqīr kā

ghaT jaa.eñ jis ko dekh ke lākhoñ tirī ghaTā

ai abr-e-tar vo dīda-e-nam hai faqīr kā

likhtā hai bin tarāshe hī harfoñ ke joḌ-toḌ

ai ḳhush-navīs ye vo qalam hai faqīr kā

zill-e-humā bhī vaañ se sa.ādat kare husūl

jis sar-zamīñ pe naqsh-e-qadam hai faqīr kā

haiñ zer-e-sāya us ke hazāroñ gadā-o-shāh

bairaq ise na keh ye alam hai faqīr kā

kyūñkar likhe na faqr ke shān-o-shikoh ko

yaaro 'nazīr' par bhī karam hai faqīr kā

rutba kuchh aashiqi mein na kam hai faqir ka

hain jis ke sab sanam wo sanam hai faqir ka

takiya ise na bhul ke kahna kabhi miyan

takiya nahin ye bagh-e-iram hai faqir ka

rahta hai phir wo phulta misl-e-sada suhag

jis gul-badan pe lutf-o-karam hai faqir ka

ghaT jaen jis ko dekh ke lakhon teri ghaTa

ai abr-e-tar wo dida-e-nam hai faqir ka

likhta hai bin tarashe hi harfon ke joD-toD

ai KHush-nawis ye wo qalam hai faqir ka

zill-e-huma bhi wan se saadat kare husul

jis sar-zamin pe naqsh-e-qadam hai faqir ka

hain zer-e-saya us ke hazaron gada-o-shah

bairaq ise na keh ye alam hai faqir ka

kyunkar likhe na faqr ke shan-o-shikoh ko

yaro 'nazir' par bhi karam hai faqir ka