ruh ko apni tah-e-dam nahin kar sakta

ruuh ko apnī tah-e-dām nahīñ kar saktā

maiñ kabhī sub.h se yuuñ shaam nahīñ kar saktā

umr-bhar saath to rah saktā huuñ tere lekin

apnī āñkheñ maiñ tire naam nahīñ kar saktā

tujh ko itnā nahīñ ma.alūm mire baare meñ

shart rakh kar maiñ koī kaam nahīñ kar saktā

mujh pe har ik se mohabbat kī ye tohmat na lagā

maiñ ki is jazbe ko yuuñ aam nahīñ kar saktā

is qadar uljhā huā rahtā huuñ ḳhud se ki 'ravish'

do ghaḌī ko bhī maiñ ārām nahīñ kar saktā

ruh ko apni tah-e-dam nahin kar sakta

main kabhi subh se yun sham nahin kar sakta

umr-bhar sath to rah sakta hun tere lekin

apni aankhen main tere nam nahin kar sakta

tujh ko itna nahin malum mere bare mein

shart rakh kar main koi kaam nahin kar sakta

mujh pe har ek se mohabbat ki ye tohmat na laga

main ki is jazbe ko yun aam nahin kar sakta

is qadar uljha hua rahta hun KHud se ki 'rawish'

do ghaDi ko bhi main aaram nahin kar sakta