ruh pahne ek badan se mar rahe hain

ruuh pahne ik badan se mar rahe haiñ

harf jo mere suḳhan se mar rahe haiñ

koī ḳhvāhish dil meñ jal kar mar ga.ī hai

aur ham us kī jalan se mar rahe haiñ

ḳhushbueñ jaane kyuuñ hijrat kar rahī haiñ

phuul jaane kis chubhan se mar rahe haiñ

maañg lo kuchh in se tum varna ye taare

TuuT kar yuuñ bhī gagan se mar rahe haiñ

jab se bāhar zehn se jiine lage haiñ

tab se andar apne man se mar rahe haiñ

hijr kī chīḳheñ dabā liiñ ham ne dil meñ

aur ab in kī ghuTan se mar rahe haiñ

jis ko shikva hai hamārī be-ruḳhī kā

ham usī ke apne-pan se mar rahe haiñ

ruh pahne ek badan se mar rahe hain

harf jo mere suKHan se mar rahe hain

koi KHwahish dil mein jal kar mar gai hai

aur hum us ki jalan se mar rahe hain

KHushbuen jaane kyun hijrat kar rahi hain

phul jaane kis chubhan se mar rahe hain

mang lo kuchh in se tum warna ye tare

TuT kar yun bhi gagan se mar rahe hain

jab se bahar zehn se jine lage hain

tab se andar apne man se mar rahe hain

hijr ki chiKHen daba lin hum ne dil mein

aur ab in ki ghuTan se mar rahe hain

jis ko shikwa hai hamari be-ruKHi ka

hum usi ke apne-pan se mar rahe hain