ruh tak aa ki mujhe us ka sahaara hai bahut

ruuh tak aa ki mujhe us kā sahārā hai bahut

jism mat chheḌ mujhe jism ne maarā hai bahut

chāñd kī kis ko talab hai ki yahāñ tārīkī

is qadar hai ki mujhe ek sitāra hai bahut

merī jānib se sadā aur sadā aur sadā

us kī jānib se faqat ek ishāra hai bahut

maiñ huuñ ḳhvāboñ kī havā tū hai haqīqat kā charāġh

paas hoñ donoñ to is meñ bhī ḳhasāra hai bahut

is kā ġham chhoḌ kahāñ kaise kaTī hijr meñ umr

vo ghaḌī soch jise saath guzārā hai bahut

tū mirā ḳhvāb hai sardī kī kisī raat kā ḳhvāb

sard hai jis meñ badan ruuh kā paara hai bahut

ruh tak aa ki mujhe us ka sahaara hai bahut

jism mat chheD mujhe jism ne mara hai bahut

chand ki kis ko talab hai ki yahan tariki

is qadar hai ki mujhe ek sitara hai bahut

meri jaanib se sada aur sada aur sada

us ki jaanib se faqat ek ishaara hai bahut

main hun KHwabon ki hawa tu hai haqiqat ka charagh

pas hon donon to is mein bhi KHasara hai bahut

is ka gham chhoD kahan kaise kaTi hijr mein umr

wo ghaDi soch jise sath guzara hai bahut

tu mera KHwab hai sardi ki kisi raat ka KHwab

sard hai jis mein badan ruh ka para hai bahut