saat-e-yak-nafas bhi bhaari hai

sā'at-e-yak-nafas bhī bhārī hai

aisī kuchh kaifiyat hamārī hai

ik ḳhalish hai jo kam nahīñ hotī

ik chubhan hai jo dil meñ jaarī hai

kis ko samjhā.eñ kaise samjhā.eñ

kyoñ tabī'at meñ sogvārī hai

parda-e-ashk-hā.e larzāñ par

jo bhī tasvīr hai tumhārī hai

ruuh meñ ghul gayā hai sannāTā

aur dil par sukūt taarī hai

aate aate hī aa.egā ārām

zaḳhm gahrā hai choT kaarī hai

lamha lamha masāfat-e-shab kā

ham ko ik ik sadī pe bhārī hai

ḳhushk āñkhoñ meñ jhāñk kar dekho

dil meñ mātam hanūz jaarī hai

jab se us ne 'adam kiyā ābād

suunī har anjuman hamārī hai

lazzateñ shab kī us ke saath ga.iiñ

ab faqat rasm-e-shab-guzārī hai

ab to mafhūm-e-zindagī 'bāsit'

ashk-rezī hai ashk-bārī hai

sa'at-e-yak-nafas bhi bhaari hai

aisi kuchh kaifiyat hamari hai

ek KHalish hai jo kam nahin hoti

ek chubhan hai jo dil mein jari hai

kis ko samjhaen kaise samjhaen

kyon tabi'at mein sogwari hai

parda-e-ashk-hae larzan par

jo bhi taswir hai tumhaari hai

ruh mein ghul gaya hai sannaTa

aur dil par sukut tari hai

aate aate hi aaega aaram

zaKHm gahra hai choT kari hai

lamha lamha masafat-e-shab ka

hum ko ek ek sadi pe bhaari hai

KHushk aankhon mein jhank kar dekho

dil mein matam hanuz jari hai

jab se us ne 'adam kiya aabaad

suni har anjuman hamari hai

lazzaten shab ki us ke sath gain

ab faqat rasm-e-shab-guzari hai

ab to mafhum-e-zindagi 'basit'

ashk-rezi hai ashk-bari hai