saf hum tum se aaj kitne hain

saaf ham tum se aaj kitne haiñ

sab tumheñ bad-mizāj kahte haiñ

tere bīmār-e-ġham ko hai vo maraz

hukamā lā-ilāj kahte haiñ

merī dhaḌkan se vo bhī na bechain

haañ ise iḳhtilāj kahte haiñ

kyā anāsir meñ hai tarī qudrat

bas ise imtizāj kahte haiñ

hai shahādat kī aarzū qātil

dil kī ham ehtiyāj kahte haiñ

dāġh-e-saudā ne sarfarāz kiyā

ham ise apnā taaj kahte haiñ

ḳhuub paidā kiyā hai naam 'anjum'

log āshiq-mizāj kahte haiñ

saf hum tum se aaj kitne hain

sab tumhein bad-mizaj kahte hain

tere bimar-e-gham ko hai wo maraz

hukama la-ilaj kahte hain

meri dhaDkan se wo bhi na bechain

han ise iKHtilaj kahte hain

kya anasir mein hai tari qudrat

bas ise imtizaj kahte hain

hai shahadat ki aarzu qatil

dil ki hum ehtiyaj kahte hain

dagh-e-sauda ne sarfaraaz kiya

hum ise apna taj kahte hain

KHub paida kiya hai nam 'anjum'

log aashiq-mizaj kahte hain