saghar ki kahani bhul gae shishe ka fasana bhul gae

sāġhar kī kahānī bhuul ga.e shīshe kā fasāna bhuul ga.e

jis vaqt laḌī saaqī se nazar ham jaam uThānā bhuul ga.e

ham mahv-e-nazāra kyā hote ai dost bhalā is mahfil meñ

jis bazm meñ hosh-o-ḳhirad kho kar ham hosh meñ aanā bhuul ga.e

hai dār-o-madār-e-ranj-o-sukūñ is dil kā un kī marzī par

jis vaqt zarā hañs hañs ke mile ham haal sunānā bhuul ga.e

sochā thā vo ḳhvāb meñ ā.eñge jī bhar ke karūñgā shikve gile

afsos ki ye bhī ho na sakā vo ḳhvāb meñ aanā bhuul ga.e

furqat meñ 'naresh'-e-ḳhasta-jāñ ko is tarah jo taḌpāte ho

duzdīda-nigāhī se apnī kyā barq girānā bhuul ga.e

saghar ki kahani bhul gae shishe ka fasana bhul gae

jis waqt laDi saqi se nazar hum jam uThana bhul gae

hum mahw-e-nazara kya hote ai dost bhala is mahfil mein

jis bazm mein hosh-o-KHirad kho kar hum hosh mein aana bhul gae

hai dar-o-madar-e-ranj-o-sukun is dil ka un ki marzi par

jis waqt zara hans hans ke mile hum haal sunana bhul gae

socha tha wo KHwab mein aaenge ji bhar ke karunga shikwe gile

afsos ki ye bhi ho na saka wo KHwab mein aana bhul gae

furqat mein 'naresh'-e-KHasta-jaan ko is tarah jo taDpate ho

duzdida-nigahi se apni kya barq girana bhul gae