sahabo manzil-e-jaanan ki taraf jaana mat

sāhabo manzil-e-jānāñ kī taraf jaanā mat

aur jaanā to kahānī koī dohrānā mat

gul khilā degā mahakte hue chehroñ kā tilism

shahar-e-ā.īna dil-e-zār ko dikhlānā mat

mujh ko chāhā hai to baḳhsho mirī chāhat ko davām

ban ke rah jaanā Dhalī raat kā afsāna mat

vasl kī chaah meñ ruknā na kisī jism ke paas

daulat-e-hijr ko saudā.iyo Thukrānā mat

sar-burīda sī guzar jaanā shahīdoñ kī tarah

titliyo dil ke dabistāñ meñ Thahar jaanā mat

ulfateñ sab ko mayassar nahīñ hotīñ pyāre

tishna lamhoñ kī mulāqāt se uktānā mat

maqtal-e-ishq na ab kūcha-e-qātil 'rāhī'

shahr-e-be-ḳhvāb meñ jaate hue ghabrānā mat

sahabo manzil-e-jaanan ki taraf jaana mat

aur jaana to kahani koi dohrana mat

gul khila dega mahakte hue chehron ka tilism

shahar-e-aina dil-e-zar ko dikhlana mat

mujh ko chaha hai to baKHsho meri chahat ko dawam

ban ke rah jaana Dhali raat ka afsana mat

wasl ki chah mein rukna na kisi jism ke pas

daulat-e-hijr ko saudaiyo Thukrana mat

sar-burida si guzar jaana shahidon ki tarah

titliyo dil ke dabistan mein Thahar jaana mat

ulfaten sab ko mayassar nahin hotin pyare

tishna lamhon ki mulaqat se uktana mat

maqtal-e-ishq na ab kucha-e-qatil 'rahi'

shahr-e-be-KHwab mein jate hue ghabrana mat