sahib-e-jurat-e-izhaar nahin hai koi

sāhib-e-jur.at-e-iz.hār nahīñ hai koī

vaqt se barsar-e-paikār nahīñ hai koī

hañs rahā huuñ maiñ sar-e-bazm-e-havādis ki jahāñ

muskurāne pe bhī tayyār nahīñ hai koī

mere har sher meñ dhaḌkan hai dil-e-ālam kī

ye hadīs-e-lab-o-ruḳhsār nahīñ hai koī

maañg kyā māñgtī hai fasl-e-bahārāñ ham se

laakh is dasht meñ gulzār nahīñ hai koī

hai baḌī raunaq-e-bāzār-e-havas shahr-ba-shahr

jins-e-ulfat kā ḳharīdār nahīñ hai koī

aaj ḳhairāt-e-masarrat ke sabhī tālib haiñ

ne.amat-e-ġham kā talabgār nahīñ hai koī

baat jo kah ke sar-e-bazm palaT jaate haiñ

un kī taqrīr kā me.aar nahīñ hai koī

kis ko rūdād-e-ġham-e-zīst sunā.ūñ jā kar

baat karne pe bhī tayyār nahīñ hai koī

ḳhvāb-e-fardā meñ use dekh rahā huuñ maiñ 'kamāl'

jis qafas meñ dar-o-dīvār nahīñ hai koī

sahib-e-jurat-e-izhaar nahin hai koi

waqt se barsar-e-paikar nahin hai koi

hans raha hun main sar-e-bazm-e-hawadis ki jahan

muskurane pe bhi tayyar nahin hai koi

mere har sher mein dhaDkan hai dil-e-alam ki

ye hadis-e-lab-o-ruKHsar nahin hai koi

mang kya mangti hai fasl-e-bahaaran hum se

lakh is dasht mein gulzar nahin hai koi

hai baDi raunaq-e-bazar-e-hawas shahr-ba-shahr

jins-e-ulfat ka KHaridar nahin hai koi

aaj KHairaat-e-masarrat ke sabhi talib hain

neamat-e-gham ka talabgar nahin hai koi

baat jo kah ke sar-e-bazm palaT jate hain

un ki taqrir ka mear nahin hai koi

kis ko rudad-e-gham-e-zist sunaun ja kar

baat karne pe bhi tayyar nahin hai koi

KHwab-e-farda mein use dekh raha hun main 'kamal'

jis qafas mein dar-o-diwar nahin hai koi