sahil ki himayat mein jazire nikal aae

sāhil kī himāyat meñ jazīre nikal aa.e

paanī se baġhāvat ke vasīle nikal aa.e

jab maañd paḌīñ yaad ke sūraj kī shuā.eñ

nisyāñ kī ḳhalāoñ meñ sitāre nikal aa.e

tai ho ga.ī ta.abīr se jab in kī sagā.ī

ḳhvāboñ se mire aur bhī rishte nikal aa.e

kis niiñd se jaagā huuñ ki har jeb se merī

fardā meñ chhupā.e hue sikke nikal aa.e

pairāhan-e-alfāz badalne ke amal meñ

kuchh ma.anī lakīroñ ke badan se nikal aa.e

Daalā jo kabhī dhuup ke sāñche meñ badan ko

kāmil mujhe karne ka.ī saa.e nikal aa.e

kholā jo ḳhalish ne kabhī sandūq-e-judā.ī

imkāñ se likhe vasl ke nusḳhe nikal aa.e

leTā thā maiñ ik dasht-e-tayaqqun meñ akelā

eḌī bhī na ragḌī thī ki chashme nikal aa.e

yuuñ zabt kī muTThī se bikharte ga.e daane

har gumbad-e-ḳhvāhish se parinde nikal aa.e

sahil ki himayat mein jazire nikal aae

pani se baghawat ke wasile nikal aae

jab mand paDin yaad ke suraj ki shuaen

nisyan ki KHalaon mein sitare nikal aae

tai ho gai tabir se jab in ki sagai

KHwabon se mere aur bhi rishte nikal aae

kis nind se jaga hun ki har jeb se meri

farda mein chhupae hue sikke nikal aae

pairahan-e-alfaz badalne ke amal mein

kuchh mani lakiron ke badan se nikal aae

Dala jo kabhi dhup ke sanche mein badan ko

kaamil mujhe karne kai sae nikal aae

khola jo KHalish ne kabhi sanduq-e-judai

imkan se likhe wasl ke nusKHe nikal aae

leTa tha main ek dasht-e-tayaqqun mein akela

eDi bhi na ragDi thi ki chashme nikal aae

yun zabt ki muTThi se bikharte gae dane

har gumbad-e-KHwahish se parinde nikal aae