saman-e-tijarat mera iman nahin hai

sāmān-e-tijārat mirā īmān nahīñ hai

har dar pe jhuke sar ye mirī shaan nahīñ hai

har lafz ko siine meñ basā lo to bane baat

tāqoñ meñ sajāne ko ye qur.ān nahīñ hai

allāh mire rizq kī barkat na chalī jaa.e

do roz se ghar meñ koī mehmān nahīñ hai

ham ne to banā.e haiñ samundar meñ bhī raste

yuuñ ham ko miTānā koī āsān nahīñ hai

vo jis ko buzurgoñ kī rivāyat na rahe yaad

us shaḳhs kī logo koī pahchān nahīñ hai

do chaar umīdoñ ke diye ab bhī haiñ raushan

maazī kī havelī abhī vīrān nahīñ hai

phūloñ kī jagah jalte hue lafz saje haiñ

ab mez pe aḳhbār haiñ guldān nahīñ hai

'mājid' hai mirā she'r mere 'ahd kī tasvīr

'ġhālib' kī ġhazal 'mīr' kā dīvān nahīñ hai

saman-e-tijarat mera iman nahin hai

har dar pe jhuke sar ye meri shan nahin hai

har lafz ko sine mein basa lo to bane baat

taqon mein sajaane ko ye quran nahin hai

allah mere rizq ki barkat na chali jae

do roz se ghar mein koi mehman nahin hai

hum ne to banae hain samundar mein bhi raste

yun hum ko miTana koi aasan nahin hai

wo jis ko buzurgon ki riwayat na rahe yaad

us shaKHs ki logo koi pahchan nahin hai

do chaar umidon ke diye ab bhi hain raushan

mazi ki haweli abhi viran nahin hai

phulon ki jagah jalte hue lafz saje hain

ab mez pe aKHbar hain guldan nahin hai

'majid' hai mera she'r mere 'ahd ki taswir

'ghaalib' ki ghazal 'mir' ka diwan nahin hai