samne koi bhi manzar na saman hota hai

sāmne koī bhī manzar na samāñ hotā hai

dil sulagtā hai to āñkhoñ meñ dhuāñ hotā hai

jaane kis shahr kī dhartī pe qadam hai apnā

apne hone pe na hone kā gumāñ hotā hai

zindagī shahd se shīrīñ hai to zahrāb bhī hai

is kā ehsās magar sab ko kahāñ hotā hai

kabhī ḳhurshīd pe hotā hai gumāñ zarre kā

koī zarra kabhī ḳhurshīd-nishāñ hotā hai

jāda-e-fahm-o-farāsat meñ bhī milte haiñ sarāb

har yaqīñ manzil-e-sad-vahm-o-gumāñ hotā hai

pattharoñ se hai shikāyat na to rāhoñ se gila

Thokareñ khā ke mirā azm javāñ hotā hai

dil kuchh is taur hai mānūs ġham-e-hastī se

aish kā is pe tasavvur bhī girāñ hotā hai

merā maazī hai sulagte hue sahrā kī tarah

sail-e-ashk āñkhoñ se yuuñ hī na ravāñ hotā hai

choT jab paḌtī hai fankār ke dil par 'jauhar'

dard sūrat-gar-e-iz.hār-e-bayāñ hotā hai

samne koi bhi manzar na saman hota hai

dil sulagta hai to aankhon mein dhuan hota hai

jaane kis shahr ki dharti pe qadam hai apna

apne hone pe na hone ka guman hota hai

zindagi shahd se shirin hai to zahrab bhi hai

is ka ehsas magar sab ko kahan hota hai

kabhi KHurshid pe hota hai guman zarre ka

koi zarra kabhi KHurshid-nishan hota hai

jada-e-fahm-o-farasat mein bhi milte hain sarab

har yaqin manzil-e-sad-wahm-o-guman hota hai

pattharon se hai shikayat na to rahon se gila

Thokaren kha ke mera azm jawan hota hai

dil kuchh is taur hai manus gham-e-hasti se

aish ka is pe tasawwur bhi giran hota hai

mera mazi hai sulagte hue sahra ki tarah

sail-e-ashk aankhon se yun hi na rawan hota hai

choT jab paDti hai fankar ke dil par 'jauhar'

dard surat-gar-e-izhaar-e-bayan hota hai