samne mere na ghairon se milata aankhen

sāmne mere na ġhairoñ se milātā āñkheñ

kuchh bhī us shoḳh ke hotī jo hayā āñkhoñ meñ

ḳhuun agar ro.uuñ kahūñ pā-e-nigārīñ kis ke

male āñkhoñ se ki hai rang-e-hinā āñkhoñ meñ

ek shab dekh ke us rashk-e-parī ko raqqās

aaj tak phirtī hai vo jumbish-e-pā āñkhoñ meñ

rashk-e-gulnār mirī āñkhoñ ko rakhtā hai mudām

bas-ki ik shāhid-e-gul-rang-qabā āñkhoñ meñ

aa.ina dekh ke mashshāta se kahtā hai vo shoḳh

chashm-e-bad-dūr ġhazab surma ghulā āñkhoñ meñ

kyā malāhat ruḳh-e-jānāñ meñ hai allāh allāh

aa gayā jis ke tasavvur se mazā āñkhoñ meñ

ham ne dekhī hai tirī āñkhoñ ke Doroñ kī bahār

kyā rag-e-gul ko hai yaañ nashv-o-numā āñkhoñ meñ

mardum-e-dīda ko hai ḳhil.at-e-zar kī ḳhvāhish

jalva-farmā ho tū ai mehr-laqā āñkhoñ meñ

saat parde meñ agar rahne se hai shauq tujhe

ye bhī ik manzar-e-pākīza hai aa āñkhoñ meñ

dil-e-ḳhūñ-kushta mirā mujh ko nihāyat hai aziiz

siina jab chaak huā hai isī jā āñkhoñ meñ

haq ne is vāste āñkhoñ meñ banā.e parde

josh-e-girya meñ tū le ashk chhupā āñkhoñ meñ

ek ishva meñ kiyā us ne 'shahīdī' ko shahīd

ḳhanjar-o-teġh hī bhar rakkhe the kyā āñkhoñ meñ

samne mere na ghairon se milata aankhen

kuchh bhi us shoKH ke hoti jo haya aankhon mein

KHun agar roun kahun pa-e-nigarin kis ke

male aankhon se ki hai rang-e-hina aankhon mein

ek shab dekh ke us rashk-e-pari ko raqqas

aaj tak phirti hai wo jumbish-e-pa aankhon mein

rashk-e-gulnar meri aankhon ko rakhta hai mudam

bas-ki ek shahid-e-gul-rang-qaba aankhon mein

aaina dekh ke mashshata se kahta hai wo shoKH

chashm-e-bad-dur ghazab surma ghula aankhon mein

kya malahat ruKH-e-jaanan mein hai allah allah

aa gaya jis ke tasawwur se maza aankhon mein

hum ne dekhi hai teri aankhon ke Doron ki bahaar

kya rag-e-gul ko hai yan nashw-o-numa aankhon mein

mardum-e-dida ko hai KHilat-e-zar ki KHwahish

jalwa-farma ho tu ai mehr-laqa aankhon mein

sat parde mein agar rahne se hai shauq tujhe

ye bhi ek manzar-e-pakiza hai aa aankhon mein

dil-e-KHun-kushta mera mujh ko nihayat hai aziz

sina jab chaak hua hai isi ja aankhon mein

haq ne is waste aankhon mein banae parde

josh-e-girya mein tu le ashk chhupa aankhon mein

ek ishwa mein kiya us ne 'shahidi' ko shahid

KHanjar-o-tegh hi bhar rakkhe the kya aankhon mein