sanp jaise ki kabhi aankh jhapakta hi nahin

saañp jaise ki kabhī aañkh jhapaktā hī nahīñ

yuuñ koī dard hai siine meñ jo sotā hī nahīñ

us se jhagḌūñ bhī to kis baat pe jhagḌūñ āḳhir

jab mire saath vo hote hue hotā hī nahīñ

hijr har shaam bujhī aañkh liye aatā hai

vasl kā chāñd kisī chhat pe nikaltā hī nahīñ

rābtoñ kī hai vo fihrist meñ ḳhāmosh kahīñ

ek number ki jo scrēn pe aatā hī nahīñ

turbat-e-zabt meñ yādoñ kī sileñ dil pe liye

tere chehre ko nigāhoñ se haTātā hī nahīñ

mere a.asāb pe taarī hai mohabbat kī thakan

itnī zyāda ki kisī haal meñ rotā hī nahīñ

chāñd 'mas.ūd' ḳhalāoñ meñ hai TūTā-phūTā

is liye maiñ to kabhī iid manātā hī nahīñ

sanp jaise ki kabhi aankh jhapakta hi nahin

yun koi dard hai sine mein jo sota hi nahin

us se jhagDun bhi to kis baat pe jhagDun aaKHir

jab mere sath wo hote hue hota hi nahin

hijr har sham bujhi aankh liye aata hai

wasl ka chand kisi chhat pe nikalta hi nahin

rabton ki hai wo fihrist mein KHamosh kahin

ek number ki jo screen pe aata hi nahin

turbat-e-zabt mein yaadon ki silen dil pe liye

tere chehre ko nigahon se haTata hi nahin

mere aasab pe tari hai mohabbat ki thakan

itni zyaada ki kisi haal mein rota hi nahin

chand 'masud' KHalaon mein hai TuTa-phuTa

is liye main to kabhi id manata hi nahin