sans lete rahen ki mar jaen

saañs lete raheñ ki mar jaa.eñ

tujh se bichhḌe hue kidhar jaa.eñ

nashtaro kārkardagī na ruke

yuuñ na hove ki zaḳhm bhar jaa.eñ

ek shab aap ke mohalle meñ

ro guzāreñ to apne ghar jaa.eñ

aa hī pahuñche haiñ yaañ to phir tum ko

kyoñ na jī-bhar ke dekh kar jaa.eñ

sunnat-e-yār ko rakheñ malhūz

'ahd-o-paimāñ kareñ mukar jaa.eñ

'ishq kī dars-gāh meñ ham log

aise bigḌeñ ki bas sudhar jaa.eñ

nuqta ho jaa.eñ tere kahne par

terī āvāz par bikhar jaa.eñ

rote rahnā hayāt hai 'kāzim'

ro na paa.eñ to ghuT ke mar jaa.eñ

sans lete rahen ki mar jaen

tujh se bichhDe hue kidhar jaen

nashtaro karkardagi na ruke

yun na howe ki zaKHm bhar jaen

ek shab aap ke mohalle mein

ro guzaren to apne ghar jaen

aa hi pahunche hain yan to phir tum ko

kyon na ji-bhar ke dekh kar jaen

sunnat-e-yar ko rakhen malhuz

'ahd-o-paiman karen mukar jaen

'ishq ki dars-gah mein hum log

aise bigDen ki bas sudhar jaen

nuqta ho jaen tere kahne par

teri aawaz par bikhar jaen

rote rahna hayat hai 'kazim'

ro na paen to ghuT ke mar jaen