sans roke raho lo phir wo sada aati hai

saañs roke raho lo phir vo sadā aatī hai

jis ko tarseñ ka.ī sadiyāñ to sunī jaatī hai

koī pahchān vahī phāñs banī hai ki jo thī

ajnabiyyat vahī har saañs meñ sharmātī hai

haath phailā.e hue maañg rahī hai kyā raat

kyuuñ añdheroñ meñ havā ro.e chalī jaatī hai

maut kī niiñd magar ab ke zarūr uchTī hai

varna ham aisoñ ko jhapkī sī kahāñ aatī hai

baat kartā huuñ maiñ sab kī ye gumāñ kaise hai

merā har sāneha merā hai bahut zaatī hai

kaifiyat sī ye magar kyā hai hamāre jī kī

jaise raftār ki raftār se Takrātī hai

apnā-pan bhī hai vahī aur vahī khoyā-pan

'talḳh' tū aaj bhī pahle sā hī jazbātī hai

sans roke raho lo phir wo sada aati hai

jis ko tarsen kai sadiyan to suni jati hai

koi pahchan wahi phans bani hai ki jo thi

ajnabiyyat wahi har sans mein sharmati hai

hath phailae hue mang rahi hai kya raat

kyun andheron mein hawa roe chali jati hai

maut ki nind magar ab ke zarur uchTi hai

warna hum aison ko jhapki si kahan aati hai

baat karta hun main sab ki ye guman kaise hai

mera har saneha mera hai bahut zati hai

kaifiyat si ye magar kya hai hamare ji ki

jaise raftar ki raftar se Takraati hai

apna-pan bhi hai wahi aur wahi khoya-pan

'talKH' tu aaj bhi pahle sa hi jazbaati hai