sanson ki jal-tarang par naghma-e-ishq gae ja

sāñsoñ kī jal-tarañg par naġhma-e-ishq gaa.e jā

ai mirī jān-e-ārzū tū yūñhī muskurā.e jā

husn-e-ḳhirām-e-nāz se jaadū na.e jagā.e jā

jab bhī jahāñ paḌeñ qadam phuul vahīñ khilā.e jā

aag lagā ke hañs kabhī ban ke ghaTā baras kabhī

bikhrā ke zulf-e-ambarīñ hosh mire uḌaa.e jā

barsoñ ke baad āñkhoñ meñ chhalkī hai pyaar kī sharāb

band na kar ye mai-kade aise hī bas pilā.e jā

mastī bhī hai samāñ bhī hai mahfil-e-dilbarāñ bhī hai

aise meñ 'tarz' jhuum kar rañg-e-ġhazal jamā.e jā

sanson ki jal-tarang par naghma-e-ishq gae ja

ai meri jaan-e-arzu tu yunhi muskurae ja

husn-e-KHiram-e-naz se jadu nae jagae ja

jab bhi jahan paDen qadam phul wahin khilae ja

aag laga ke hans kabhi ban ke ghaTa baras kabhi

bikhra ke zulf-e-ambarin hosh mere uDae ja

barson ke baad aankhon mein chhalki hai pyar ki sharab

band na kar ye mai-kade aise hi bas pilae ja

masti bhi hai saman bhi hai mahfil-e-dilbaran bhi hai

aise mein 'tarz' jhum kar rang-e-ghazal jamae ja