sanson ki TuTi sargam mein ek miTha swar yaad raha

sāñsoñ kī TuuTī sargam meñ ik mīThā svar yaad rahā

yuuñ to sab kuchh bhuul gayā maiñ par terā ghar yaad rahā

yuuñ bhī koī milnā hai jo milne kī ghaḌiyoñ meñ bhī

milne se pahle is zālim duniyā kā Dar yaad rahā

varna maiñ bhī jhuk hī jaatā zulm kī andhī chaukhaT par

achchhā rahā ki mujh ko apne shā.ir kā sar yaad rahā

hoñToñ se jo baat huī vo nīl-gagan tak jā pahuñchī

āñkhoñ ne jo likkhā dil par akhshar akhshar yaad rahā

jis ke kāran tyaag tapasyā aur tap ko vanvās milā

soch rahā huuñ ik raanī ko kyuuñ aisā var yaad rahā

sanson ki TuTi sargam mein ek miTha swar yaad raha

yun to sab kuchh bhul gaya main par tera ghar yaad raha

yun bhi koi milna hai jo milne ki ghaDiyon mein bhi

milne se pahle is zalim duniya ka Dar yaad raha

warna main bhi jhuk hi jata zulm ki andhi chaukhaT par

achchha raha ki mujh ko apne shair ka sar yaad raha

honTon se jo baat hui wo nil-gagan tak ja pahunchi

aankhon ne jo likkha dil par akhshar akhshar yaad raha

jis ke karan tyag tapasya aur tap ko wanwas mila

soch raha hun ek rani ko kyun aisa war yaad raha