saqi-e-KHum-KHana tha jo subh-o-sham

sāqī-e-ḳhum-ḳhāna thā jo sub.h-o-shām

roz-e-ādīna thā masjid meñ imaam

jis ne chashm-e-mast-e-sāqī dekh lī

tā-qayāmat us pe hushyārī harām

is lab-e-jāñ-baḳhsh kī bāteñ thiiñ yā

mo.ajazāt-e-īsī-e-gardūñ-maqām

ho gayā us ko qayāmat kā yaqīñ

jis ne dekhā sarv-qāmat kā ḳhirām

chashma-e-āb-e-baqā kī lahr thī

vo ibārat vo ishārat lā-kalām

marhabā itr-e-garebāñ kī shamīm

hai mo.attar jis se rūhānī mashām

thī zabāñ yā qāte-e-auhām yā

zulfiqār-e-haidarī thī be-niyām

jis ne dekhā nargis-e-shahlā kā ḳhvāb

is ne paayā ramz-e-qalbī lā-yanām

qaala atmamto alaikum ne.matī

ho ga.iiñ sab ḳhūbiyāñ us par tamām

jis ne chāTī utba-e-uliyā kī ḳhaak

talḳhī-e-daurāñ se ho kyuuñ talḳh-kām

ai sabā sahrā-e-jāñ meñ kar talāsh

kis taraf haiñ vo surādiq vo ḳhiyām

ḳhalvat-e-lailā meñ tū guzre agar

to ye kah denā hamārā bhī payām

tishnigān-e-shauq haiñ gum-karda-rāh

tū bhī chal bahr-e-ḳhudā do-chār gaam

bahr meñ barpā huā josh-o-ḳharosh

habbazā rushhāt-e-kāsātil-kirām

sauñp dī thī dast-e-qudrat ne tujhe

nāqa-e-lailā-e-ma.anī kī zamām

saqi-e-KHum-KHana tha jo subh-o-sham

roz-e-adina tha masjid mein imam

jis ne chashm-e-mast-e-saqi dekh li

ta-qayamat us pe hushyari haram

is lab-e-jaan-baKHsh ki baaten thin ya

moajazat-e-isi-e-gardun-maqam

ho gaya us ko qayamat ka yaqin

jis ne dekha sarw-qamat ka KHiram

chashma-e-ab-e-baqa ki lahr thi

wo ibarat wo ishaarat la-kalam

marhaba itr-e-gareban ki shamim

hai moattar jis se ruhani masham

thi zaban ya qate-e-auham ya

zulfiqar-e-haidari thi be-niyam

jis ne dekha nargis-e-shahla ka KHwab

is ne paya ramz-e-qalbi la-yanam

qala atmamto alaikum nemati

ho gain sab KHubiyan us par tamam

jis ne chaTi utba-e-uliya ki KHak

talKHi-e-dauran se ho kyun talKH-kaam

ai saba sahra-e-jaan mein kar talash

kis taraf hain wo suradiq wo KHiyam

KHalwat-e-laila mein tu guzre agar

to ye kah dena hamara bhi payam

tishnigan-e-shauq hain gum-karda-rah

tu bhi chal bahr-e-KHuda do-chaar gam

bahr mein barpa hua josh-o-KHarosh

habbaza rushhat-e-kasatil-kiram

saunp di thi dast-e-qudrat ne tujhe

naqa-e-laila-e-mani ki zamam