saqi ki ek nigah ke afsane ban gae

saaqī kī ik nigāh ke afsāne ban ga.e

kuchh phuul TuuT kar mire paimāne ban ga.e

kaaTī jahāñ tasavvur-e-jānāñ meñ ek shab

kahte haiñ log us jagah but-ḳhāne ban ga.e

jin par na saa.e zulf-e-ġhazālāñ ke paḌ sake

ehsās kī nigāh meñ vīrāne ban ga.e

jo pī sake na surḳh laboñ kī tajalliyāñ

duniyā ke tajrabāt se anjāne ban ga.e

'sāġhar' vahī maqām hai ik manzil-e-farāz

apne bhī jis maqām pe begāne ban ga.e

saqi ki ek nigah ke afsane ban gae

kuchh phul TuT kar mere paimane ban gae

kaTi jahan tasawwur-e-jaanan mein ek shab

kahte hain log us jagah but-KHane ban gae

jin par na sae zulf-e-ghazalan ke paD sake

ehsas ki nigah mein virane ban gae

jo pi sake na surKH labon ki tajalliyan

duniya ke tajrabaat se anjaane ban gae

'saghar' wahi maqam hai ek manzil-e-faraaz

apne bhi jis maqam pe begane ban gae