saqi teri nazar ke parastar kya hue

saaqī tirī nazar ke parastār kyā hue

vīrān bāda-ḳhāna hai mai-ḳhvār kyā hue

aahaT hai aah kī na sadā hai karāh kī

ai chārāgar batā tire bīmār kyā hue

kyā qaidiyoñ kī aah ne zindāñ ko Dhā diyā

darbāñ kahāñ ga.e dar-o-dīvār kyā hue

saarā jahān aaj bhī bāzār-e-misr hai

yūsuf-farosh chup haiñ ḳharīdār kyā hue

allāh re karishma-e-josh-e-junūn-e-ishq

ham be-ḳhudī meñ kho ga.e hushiyār kyā hue

vo aa.eñ sāmne to maiñ pūchhūñ ba-sad-adab

va.ade tamām aap ke sarkār kyā hue

ik shauq-e-nā-tamām ne añgḌā.ī lī 'muhib'

aaj un ke ittifāq se dīdār kyā hue

saqi teri nazar ke parastar kya hue

viran baada-KHana hai mai-KHwar kya hue

aahaT hai aah ki na sada hai karah ki

ai chaaragar bata tere bimar kya hue

kya qaidiyon ki aah ne zindan ko Dha diya

darban kahan gae dar-o-diwar kya hue

sara jahan aaj bhi bazar-e-misr hai

yusuf-farosh chup hain KHaridar kya hue

allah re karishma-e-josh-e-junun-e-ishq

hum be-KHudi mein kho gae hushiyar kya hue

wo aaen samne to main puchhun ba-sad-adab

wade tamam aap ke sarkar kya hue

ek shauq-e-na-tamam ne angDai li 'muhib'

aaj un ke ittifaq se didar kya hue