saqi wo baat aur hai marzi teri na ho

saaqī vo baat aur hai marzī tirī na ho

mumkin nahīñ ki shīshe meñ kuchh bhī bachī na ho

hālat ḳharāb aisī kisī kī huī na ho

iisā bhī aa.eñ to bhī mirī jaañ barī na ho

siine meñ shor aaj hai kaisā machā huā

dekho to aarzū koī sar pīTtī na ho

furqat meñ jaan bachne kī ummīd to nahīñ

haañ aur chaar din mirī hālat burī na ho

tum haath mere siine pe rakkho to naaz se

mumkin nahīñ ki dard-e-jigar meñ kamī na ho

kyūñkar banegā aap ke aane se us kā kaam

bachne kī jis ġharīb ke ummīd hī na ho

kyā kyā bahak rahā hai ye bātoñ meñ dekhnā

mujh ko gumān hai kahīñ vaa.iz ne pī na ho

girtā na ek din bhī ki jis meñ bajā.e ashk

āñkhoñ se merī ḳhuun kī naddī bahī na ho

vo shoḳh mehrbāñ ho to duniyā ho mehrbāñ

vo mudda.ā na ho to koī mudda.ī na ho

dil pherne kā us se na hargiz karūñ savāl

zālim ne chashm-e-mehr agar pher lī na ho

khāne ke vāste ġham-e-ulfat na ho agar

is lutf is maze se basar zindagī na ho

pahlū meñ tum raqīb ke baiTho ḳhudā kī shaan

dekho qayāmat aaj kahīñ uTh khaḌī na ho

dil thaam kar uThā jo abhī un kī bazm se

mujh ko gumān hai kahīñ 'hāmid' yahī na ho

saqi wo baat aur hai marzi teri na ho

mumkin nahin ki shishe mein kuchh bhi bachi na ho

haalat KHarab aisi kisi ki hui na ho

isa bhi aaen to bhi meri jaan bari na ho

sine mein shor aaj hai kaisa macha hua

dekho to aarzu koi sar piTti na ho

furqat mein jaan bachne ki ummid to nahin

han aur chaar din meri haalat buri na ho

tum hath mere sine pe rakkho to naz se

mumkin nahin ki dard-e-jigar mein kami na ho

kyunkar banega aap ke aane se us ka kaam

bachne ki jis gharib ke ummid hi na ho

kya kya bahak raha hai ye baaton mein dekhna

mujh ko guman hai kahin waiz ne pi na ho

girta na ek din bhi ki jis mein bajae ashk

aankhon se meri KHun ki naddi bahi na ho

wo shoKH mehrban ho to duniya ho mehrban

wo muddaa na ho to koi muddai na ho

dil pherne ka us se na hargiz karun sawal

zalim ne chashm-e-mehr agar pher li na ho

khane ke waste gham-e-ulfat na ho agar

is lutf is maze se basar zindagi na ho

pahlu mein tum raqib ke baiTho KHuda ki shan

dekho qayamat aaj kahin uTh khaDi na ho

dil tham kar uTha jo abhi un ki bazm se

mujh ko guman hai kahin 'hamid' yahi na ho