saqiya lutf mai ka jab aae

sāqiyā lutf mai kā jab aa.e

jaam par jaam be-talab aa.e

tum na milte agar to yuuñ lagtā

ham zamāne meñ be-sabab aa.e

shaḳhs ik se thiiñ raunaqeñ saarī

vo jab aaya lagā ki sab aa.e

rashk se chāñd jal uThā kitnā

baam par jab vo ek shab aa.e

zindagī tū to bevafā niklī

maut bhī kaun jaane kab aa.e

kab talak maut se raheñ Darte

kal hai aanā jise vo ab aa.e

baat vā'iz kī maan leñ kaise

bin piye chain ham ko kab aa.e

lab hoñ sūkhe to ai 'sadā' kaise

harf-e-tauba bhī zer-e-lab aa.e

saqiya lutf mai ka jab aae

jam par jam be-talab aae

tum na milte agar to yun lagta

hum zamane mein be-sabab aae

shaKHs ek se thin raunaqen sari

wo jab aaya laga ki sab aae

rashk se chand jal uTha kitna

baam par jab wo ek shab aae

zindagi tu to bewafa nikli

maut bhi kaun jaane kab aae

kab talak maut se rahen Darte

kal hai aana jise wo ab aae

baat wa'iz ki man len kaise

bin piye chain hum ko kab aae

lab hon sukhe to ai 'sada' kaise

harf-e-tauba bhi zer-e-lab aae