sare chaqmaq-badan aae tha tayyari se

saare chaqmāq-badan aa.e thā tayyārī se

raushnī ḳhuub huī raat kī chingārī se

un daraḳhtoñ kī udāsī pe taras aatā hai

lakḌiyāñ rang na duuñ aag kī pichkārī se

koī dā'vā bhī nahīñ kartā masīhā.ī kā

ham bhī āzād hue jaate haiñ bīmārī se

muñh lagāyā hī nahīñ aslaha-sāzoñ ko kabhī

maiñ ne duniyā ko harāyā bhī to dildārī se

'ishq bhī log numā.ish ke liye karte haiñ

kyā namāzeñ bhī paḌhī jaatī haiñ 'ayyārī se

saarā bāzār chalā aayā hai ghar meñ phir bhī

baaz aate haiñ kahāñ log ḳharīdārī se

āḳhirī niiñd se pahle kahāñ samjheñge ham

ḳhvāb se Darnā zarūrī hai ki bedārī se

husn jis chhāñv meñ baiThā thā vo qātil to na thī

jal ga.e jism nigāhoñ kī shajar-kārī se

kam-se-kam maiñ to murīd un kā nahīñ ho saktā

jo pas-e-raqs-e-junūñ baiThe haiñ hushyārī se

sare chaqmaq-badan aae tha tayyari se

raushni KHub hui raat ki chingari se

un daraKHton ki udasi pe taras aata hai

lakDiyan rang na dun aag ki pichkari se

koi da'wa bhi nahin karta masihai ka

hum bhi aazad hue jate hain bimari se

munh lagaya hi nahin aslaha-sazon ko kabhi

main ne duniya ko haraya bhi to dildari se

'ishq bhi log numaish ke liye karte hain

kya namazen bhi paDhi jati hain 'ayyari se

sara bazar chala aaya hai ghar mein phir bhi

baz aate hain kahan log KHaridari se

aaKHiri nind se pahle kahan samjhenge hum

KHwab se Darna zaruri hai ki bedari se

husn jis chhanw mein baiTha tha wo qatil to na thi

jal gae jism nigahon ki shajar-kari se

kam-se-kam main to murid un ka nahin ho sakta

jo pas-e-raqs-e-junun baiThe hain hushyari se