sare to nahin jaan bachane mein lage hain

saare to nahīñ jaan bachāne meñ lage haiñ

kuchh ghaav hameñ zaḳhm lagāne meñ lage haiñ

hai sab ko ḳhabar shaah ke chehre pe hai kālak

ā.īne magar saare chhupāne meñ lage haiñ

bech aa.e ise is ke nigahbān kabhī kā

ham log magar ghar ko sajāne meñ lage haiñ

baiThā hī nahīñ jaatā parindoñ meñ bhī ab to

be-par kī yahāñ ye bhī uḌāne meñ lage haiñ

marne pe khulī hai tire darvesh kī qīmat

patthar bhī sirhāne ke ḳhazāne meñ lage haiñ

sahrā meñ chalā aayā huuñ kuchh pyaas bujhā luuñ

dariyāoñ pe sab piine pilāne meñ lage haiñ

aa jā.egī chakkar meñ hamāre vo kisī din

ham gardish-e-daurāñ ko ghumāne meñ lage haiñ

lagtā hī nahīñ daur-e-mohabbat bhī kabhī thā

ab log yahāñ sirf kamāne meñ lage haiñ

us ne bhī to hai vaqt kī gardish ko sañvārā

'aḳhtar' se ka.ī chāñd zamāne meñ lage haiñ

sare to nahin jaan bachane mein lage hain

kuchh ghaw hamein zaKHm lagane mein lage hain

hai sab ko KHabar shah ke chehre pe hai kalak

aaine magar sare chhupane mein lage hain

bech aae ise is ke nigahban kabhi ka

hum log magar ghar ko sajaane mein lage hain

baiTha hi nahin jata parindon mein bhi ab to

be-par ki yahan ye bhi uDane mein lage hain

marne pe khuli hai tere darwesh ki qimat

patthar bhi sirhane ke KHazane mein lage hain

sahra mein chala aaya hun kuchh pyas bujha lun

dariyaon pe sab pine pilane mein lage hain

aa jaegi chakkar mein hamare wo kisi din

hum gardish-e-dauran ko ghumane mein lage hain

lagta hi nahin daur-e-mohabbat bhi kabhi tha

ab log yahan sirf kamane mein lage hain

us ne bhi to hai waqt ki gardish ko sanwara

'aKHtar' se kai chand zamane mein lage hain