sare zalim agar saf-ba-saf ho gae

saare zālim agar saf-ba-saf ho ga.e

ham tahī-dast bhī sar-ba-kaf ho ga.e

vo jo kuchh bhī na the ab haiñ sab kuchh vahī

dar-ba-dar saare ahl-e-sharaf ho ga.e

kūza-gar kā kamāl-e-hunar kyā huā

jab na kuuza bane ham ḳhazaf ho ga.e

ye tirī yaad ke ashk the is liye

aañkh meñ misl-e-durr-e-sadaf ho ga.e

munsalik ik ḳhushī se huī har ḳhushī

saare ġham ek hī ġham meñ laf ho ga.e

baat us se sar-e-rāh kyā ham ne kī

nāvak-e-dostāñ kā hadaf ho ga.e

ab hamārī safā.ī meñ aa.e ho tum

jab ki bad-nām ham har taraf ho ga.e

nashr hotī rahīñ un kī bas ḳhūbiyāñ

jumle tanqīd ke sab hazaf ho ga.e

vo talab kar rahe haiñ vafādāriyāñ

munharif jo uThā kar halaf ho ga.e

mujrmoñ ko murā.āt itnī milīñ

ki jarā.em bhī shuġhl-o-shaġhaf ho ga.e

tuf ye aulād-e-be-his ki jis ke sabab

rā.egāñ kār-hā-e-salaf ho ga.e

sare zalim agar saf-ba-saf ho gae

hum tahi-dast bhi sar-ba-kaf ho gae

wo jo kuchh bhi na the ab hain sab kuchh wahi

dar-ba-dar sare ahl-e-sharaf ho gae

kuza-gar ka kamal-e-hunar kya hua

jab na kuza bane hum KHazaf ho gae

ye teri yaad ke ashk the is liye

aankh mein misl-e-durr-e-sadaf ho gae

munsalik ek KHushi se hui har KHushi

sare gham ek hi gham mein laf ho gae

baat us se sar-e-rah kya hum ne ki

nawak-e-dostan ka hadaf ho gae

ab hamari safai mein aae ho tum

jab ki bad-nam hum har taraf ho gae

nashr hoti rahin un ki bas KHubiyan

jumle tanqid ke sab hazaf ho gae

wo talab kar rahe hain wafadariyan

munharif jo uTha kar halaf ho gae

mujrmon ko muraat itni milin

ki jaraem bhi shughl-o-shaghaf ho gae

tuf ye aulad-e-be-his ki jis ke sabab

raegan kar-ha-e-salaf ho gae