saarī bastī meñ rafīq-e-mo'atabar koī nahīñ
aisī vīrānī ki tā-hadd-e-nazar koī nahīñ
is liye mahfil meñ shāyad jalva-gar koī nahīñ
sab tamāshā-gar haiñ lekin dīda-var koī nahīñ
bhiiḌ to aisī hai rāhoñ par ki chalnā hai muhāl
merī tanhā.ī ki merā ham-safar koī nahīñ
ham to ḳhushbū haiñ bikhar jaate haiñ gul se chhūT kar
ham yahāñ be-ghar hue phir apnā ghar koī nahīñ
band hotā hai agar ik dar to khulte haiñ hazār
ye na kahnā ab ki terā dād-gar koī nahīñ
fart-e-ġham meñ ham usī manzil pe jā pahoñche jahāñ
ham-zabāñ koī nahīñ hai ham-safar koī nahīñ
aa.ina TuuTe to mil jaate haiñ sad.hā shīshagar
dil agar TuuTe to us kā chārāgar koī nahīñ
be-niyāz-e-sang-e-dar jab tak thā maiñ dar the hazār
ab jo sang-e-dar kī hasrat hai to dar koī nahīñ
allah allāh fitna-e-ayyām kī nairañgiyāñ
har taraf shīsha-shikan haiñ shīshagar koī nahīñ
ham 'musavvir' un ko DhūñDheñ bhī to ab DhūñDheñ kahāñ
the jahāñ raste vahāñ ab rahguzar koī nahīñ
sari basti mein rafiq-e-mo'atabar koi nahin
aisi virani ki ta-hadd-e-nazar koi nahin
is liye mahfil mein shayad jalwa-gar koi nahin
sab tamasha-gar hain lekin dida-war koi nahin
bhiD to aisi hai rahon par ki chalna hai muhaal
meri tanhai ki mera ham-safar koi nahin
hum to KHushbu hain bikhar jate hain gul se chhuT kar
hum yahan be-ghar hue phir apna ghar koi nahin
band hota hai agar ek dar to khulte hain hazar
ye na kahna ab ki tera dad-gar koi nahin
fart-e-gham mein hum usi manzil pe ja pahonche jahan
ham-zaban koi nahin hai ham-safar koi nahin
aaina TuTe to mil jate hain sadha shishagar
dil agar TuTe to us ka chaaragar koi nahin
be-niyaz-e-sang-e-dar jab tak tha main dar the hazar
ab jo sang-e-dar ki hasrat hai to dar koi nahin
allah allah fitna-e-ayyam ki nairangiyan
har taraf shisha-shikan hain shishagar koi nahin
hum 'musawwir' un ko DhunDhen bhi to ab DhunDhen kahan
the jahan raste wahan ab rahguzar koi nahin
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.