sari ummid rahi jati hai

saarī ummīd rahī jaatī hai

haa.e phir sub.h huī jaatī hai

niiñd aatī hai na vo aate haiñ

raat guzrī hī chalī jaatī hai

majma.a-e-hashr meñ rūdād-e-shabāb

vo sune bhī to kahī jaatī hai

dāstāñ puurī na hone paa.ī

zindagī ḳhatm huī jaatī hai

vo na aa.e haiñ to bechain hai ruuh

abhī aatī hai abhī jaatī hai

zindagī aap ke dīvāne kī

kisī sūrat se kaTī jaatī hai

ġham meñ parvānoñ ke ik muddat se

sham.a ghultī hī chalī jaatī hai

aap mahfil se chale jaate haiñ

dāstāñ baaqī rahī jaatī hai

ham to 'bismil' hī rahe ḳhair huī

ishq meñ jaan chalī jaatī hai

sari ummid rahi jati hai

hae phir subh hui jati hai

nind aati hai na wo aate hain

raat guzri hi chali jati hai

majma-e-hashr mein rudad-e-shabab

wo sune bhi to kahi jati hai

dastan puri na hone pai

zindagi KHatm hui jati hai

wo na aae hain to bechain hai ruh

abhi aati hai abhi jati hai

zindagi aap ke diwane ki

kisi surat se kaTi jati hai

gham mein parwanon ke ek muddat se

shama ghulti hi chali jati hai

aap mahfil se chale jate hain

dastan baqi rahi jati hai

hum to 'bismil' hi rahe KHair hui

ishq mein jaan chali jati hai