sath de sakta nahin zahid ka iman dur tak

saath de saktā nahīñ zāhid kā īmāñ duur tak

jā rahī hai merī fikr-e-nā-musalmāñ duur tak

tere dīvānoñ ne shāne kī qasam khaa.ī hai aaj

baat ab jā.egī ai zulf-e-pareshāñ duur tak

ai junūn-e-āsmāñ-parvāz terā shukriya

jā rahā hai aaj uḌ uḌ kar garebāñ duur tak

ye nahīñ mumkin ki sāhil kā tasavvur Duub jaa.e

kuchh safīnoñ ko Dubote jaa.eñ tūfāñ duur tak

jis ko aanā hai vo aa.e jis ko rahnā hai rahe

rahguzar hī rahguzar hai duur tak haañ duur tak

ai shab-e-ġham kyā karūñ ḳhvāb-e-sahar kā kyā karūñ

hai falak par to charāġhāñ hī charāġhāñ duur tak

moch āḳhir aa ga.ī vīrāniyoñ ke paañv meñ

saath to gulshan ke dauḌe the bayābāñ duur tak

sath de sakta nahin zahid ka iman dur tak

ja rahi hai meri fikr-e-na-musalman dur tak

tere diwanon ne shane ki qasam khai hai aaj

baat ab jaegi ai zulf-e-pareshan dur tak

ai junun-e-asman-parwaz tera shukriya

ja raha hai aaj uD uD kar gareban dur tak

ye nahin mumkin ki sahil ka tasawwur Dub jae

kuchh safinon ko Dubote jaen tufan dur tak

jis ko aana hai wo aae jis ko rahna hai rahe

rahguzar hi rahguzar hai dur tak han dur tak

ai shab-e-gham kya karun KHwab-e-sahar ka kya karun

hai falak par to charaghan hi charaghan dur tak

moch aaKHir aa gai viraniyon ke panw mein

sath to gulshan ke dauDe the bayaban dur tak