sath sae ki tarah wahshat mein uryani hui

saath saa.e kī tarah vahshat meñ uryānī huī

mujh se dīvāne ke pīchhe ye bhī dīvānī huī

sadqe un kī zulf ke merī pareshānī huī

maiñ to dīvāna thā ye bhī aaj dīvānī huī

un ke āñchal meñ adā ban kar qayāmat chhup chukī

vo mirī jaanī huī vo merī pahchānī huī

kis ke jalve ne nigāh-e-shauq par Daalā asar

tuur ke dāman meñ achchhī barq jaulānī huī

ab jo khul-kheleñ ye joban koī is ko kyā kare

parde parde meñ bahut un kī nigahbānī huī

mānte haiñ vo mujhe ye ġhair ko taslīm hai

maan lete haiñ mirī ye baat hai maanī huī

ġhair hī ke ho raheñ ab kyā rafū karte haiñ vo

chāk-dāmānī se un kī chāk-dāmānī huī

qaht thā kitne maze kā husn-e-arzāñ bik gayā

is girānī meñ maze aa.e vo arzānī huī

zulf-o-ruḳh ne maarā taarā dīda-o-dil kyā kaheñ

kis ko hairānī huī kis ko pareshānī huī

zamzamī meñ jām-e-mai meñ gir gayā paanī sivā

thī mirī qismat meñ jaisī aaj sab paanī huī

va.ada dushman se na thā to hashr meñ sharmā.e kyuuñ

is tarah vo chup haiñ goyā baat hai maanī huī

dekh kar sabza mirī turbat kā badlī vaz-e-jaur

āsmānī aap kī poshāk kyuuñ dhānī huī

Dher haiñ kitne yahāñ bām-e-hasīnāñ se buland

jins-e-dil uThtī nahīñ itnī farāvānī huī

pāk-sāf aisī hai jis ne pī farishta ban gayā

zāhido ye huur ke dāman meñ hai chhānī huī

band TuuTe maskī mahram rañg uḌā joban luTā

ġhair ke ghar jā ke un kī ḳhuub mehmānī huī

aa.eñ jā.eñge adū ham toḌ kar baiTheñge paañv

aap ne darbāñ banāyā ham se darbānī huī

shakl kyā khiñchtī mirī maiñ gard-bād-e-dasht thā

gard tasvīr-e-junūñ se san.at-e-mānī huī

piite hī duniyā ke jhagḌoñ se hue be-fikr ham

kis qadar dushvāriyāñ thiiñ kitnī āsānī huī

dāman-e-gulchīñ meñ bhī kuchh phuul barsā.e 'riyāz'

kahiye kuchh us kī zamīñ meñ bhī gul-afshānī huī

sath sae ki tarah wahshat mein uryani hui

mujh se diwane ke pichhe ye bhi diwani hui

sadqe un ki zulf ke meri pareshani hui

main to diwana tha ye bhi aaj diwani hui

un ke aanchal mein ada ban kar qayamat chhup chuki

wo meri jaani hui wo meri pahchani hui

kis ke jalwe ne nigah-e-shauq par Dala asar

tur ke daman mein achchhi barq jaulani hui

ab jo khul-khelen ye joban koi is ko kya kare

parde parde mein bahut un ki nigahbani hui

mante hain wo mujhe ye ghair ko taslim hai

man lete hain meri ye baat hai mani hui

ghair hi ke ho rahen ab kya rafu karte hain wo

chaak-damani se un ki chaak-damani hui

qaht tha kitne maze ka husn-e-arzan bik gaya

is girani mein maze aae wo arzani hui

zulf-o-ruKH ne mara tara dida-o-dil kya kahen

kis ko hairani hui kis ko pareshani hui

zamzami mein jam-e-mai mein gir gaya pani siwa

thi meri qismat mein jaisi aaj sab pani hui

wada dushman se na tha to hashr mein sharmae kyun

is tarah wo chup hain goya baat hai mani hui

dekh kar sabza meri turbat ka badli waz-e-jaur

aasmani aap ki poshak kyun dhani hui

Dher hain kitne yahan baam-e-hasinan se buland

jins-e-dil uThti nahin itni farawani hui

pak-saf aisi hai jis ne pi farishta ban gaya

zahido ye hur ke daman mein hai chhani hui

band TuTe maski mahram rang uDa joban luTa

ghair ke ghar ja ke un ki KHub mehmani hui

aaen jaenge adu hum toD kar baiThenge panw

aap ne darban banaya hum se darbani hui

shakl kya khinchti meri main gard-baad-e-dasht tha

gard taswir-e-junun se sanat-e-mani hui

pite hi duniya ke jhagDon se hue be-fikr hum

kis qadar dushwariyan thin kitni aasani hui

daman-e-gulchin mein bhi kuchh phul barsae 'riyaz'

kahiye kuchh us ki zamin mein bhi gul-afshani hui