sath tera hua agar mahsus

saath terā huā agar mahsūs

mujh ko hogā na ye safar mahsūs

husn-e-jānāñ kā zikr ho to ziist

hone lagtī hai muḳhtasar mahsūs

hai gul-e-sar-sabad ruḳh-e-anvar

lamha lamha ho tāza-tar mahsūs

kar rahe haiñ firāq ko donoñ

vo udhar aur ham idhar mahsūs

hijr kā dukh na ho to kyūñkar ho

lazzat-e-vasl is qadar mahsūs

hai vo nā-vāqif-e-junūñ jo kare

dasht ko dasht ghar ko ghar mahsūs

raushnī kyā karegā duniyā meñ

ho añdheroñ se jis ko Dar mahsūs

apne dil ko TaTol kar dekho

aañkh kartī nahīñ agar mahsūs

apne hī ḳhvāb meñ na rah 'anjum'

'ahd ke dard ko bhī kar mahsūs

sath tera hua agar mahsus

mujh ko hoga na ye safar mahsus

husn-e-jaanan ka zikr ho to zist

hone lagti hai muKHtasar mahsus

hai gul-e-sar-sabad ruKH-e-anwar

lamha lamha ho taza-tar mahsus

kar rahe hain firaq ko donon

wo udhar aur hum idhar mahsus

hijr ka dukh na ho to kyunkar ho

lazzat-e-wasl is qadar mahsus

hai wo na-waqif-e-junun jo kare

dasht ko dasht ghar ko ghar mahsus

raushni kya karega duniya mein

ho andheron se jis ko Dar mahsus

apne dil ko TaTol kar dekho

aankh karti nahin agar mahsus

apne hi KHwab mein na rah 'anjum'

'ahd ke dard ko bhi kar mahsus