sab chale tere aastan ko chhoD

sab chale tere āstāñ ko chhoḌ

bad-zabāñ ab to is zabāñ ko chhoḌ

mat uThā yaar tere kūche meñ

aan baiThe haiñ do jahāñ ko chhoḌ

vaqt-e-saḳhtī ke aah jaatī hai

jaan bhī jism-e-nā-tavāñ ko chhoḌ

sohbat-e-rāst kab ho kaj se barār

tiir āḳhir chalā kamāñ ko chhoḌ

dast-e-be-dād-e-bāġhbāñ se aah

ham chale āḳhir āshiyāñ ko chhoḌ

baaġh se vo phirā to murġh-e-chaman

lag chale saath gulsitāñ ko chhoḌ

nā-tavānī se misl-e-naqsh-e-qadam

rahe nā-chār kārvāñ ko chhoḌ

ham-nashīñ kah tamām qissa-e-ishq

āj-kal par na dāstāñ ko chhoḌ

ye mirā haal hai jo vo qātil

uTh gayā dam ke mehmāñ ko chhoḌ

jis tarah pher halq par ḳhanjar

de koī murġh-e-nīm-jāñ ko chhoḌ

kar javānī pe rahm 'jur.at' kī

bas ġham-e-ishq is javāñ ko chhoḌ

sab chale tere aastan ko chhoD

bad-zaban ab to is zaban ko chhoD

mat uTha yar tere kuche mein

aan baiThe hain do jahan ko chhoD

waqt-e-saKHti ke aah jati hai

jaan bhi jism-e-na-tawan ko chhoD

sohbat-e-rast kab ho kaj se barar

tir aaKHir chala kaman ko chhoD

dast-e-be-dad-e-baghban se aah

hum chale aaKHir aashiyan ko chhoD

bagh se wo phira to murgh-e-chaman

lag chale sath gulsitan ko chhoD

na-tawani se misl-e-naqsh-e-qadam

rahe na-chaar karwan ko chhoD

ham-nashin kah tamam qissa-e-ishq

aaj-kal par na dastan ko chhoD

ye mera haal hai jo wo qatil

uTh gaya dam ke mehman ko chhoD

jis tarah pher halq par KHanjar

de koi murgh-e-nim-jaan ko chhoD

kar jawani pe rahm 'jurat' ki

bas gham-e-ishq is jawan ko chhoD