sab gham kahen jise ki tamanna kahen jise

sab ġham kaheñ jise ki tamannā kaheñ jise

vo iztirāb-e-shauq hai ham kyā kaheñ jise

hai johd-e-munfarid sabab-e-kārobār-e-dahr

ik iztirāb-e-qatra hai dariyā kaheñ jise

ne.amat kā e'tibār hai husn-e-qubūl se

ishrat bhī ek ġham hai gavārā kaheñ jise

miltā nahīñ hai ahl-e-junūñ kā koī surāġh

bas ek naqsh-e-pā hai ki sahrā kaheñ jise

pahle hayāt-e-shauq thī allāh-re inqalāb

ab e'tibār-e-ġham hai tamannā kaheñ jise

hai mere kā.enāt-e-tasavvur kā ik fareb

vo jalva-e-ḳhayāl ki duniyā kaheñ jise

kuchh kam-nigāhiyāñ haiñ tajallī kī aaḌ se

aisī bhī ik nigāh-e-tamāshā kaheñ jise

tanhā.ī-e-ḳhayāl se 'tābish' ye haal hai

aisā koī nahīñ ki ham apnā kaheñ jise

sab gham kahen jise ki tamanna kahen jise

wo iztirab-e-shauq hai hum kya kahen jise

hai johd-e-munfarid sabab-e-karobar-e-dahr

ek iztirab-e-qatra hai dariya kahen jise

neamat ka e'tibar hai husn-e-qubul se

ishrat bhi ek gham hai gawara kahen jise

milta nahin hai ahl-e-junun ka koi suragh

bas ek naqsh-e-pa hai ki sahra kahen jise

pahle hayat-e-shauq thi allah-re inqalab

ab e'tibar-e-gham hai tamanna kahen jise

hai mere kaenat-e-tasawwur ka ek fareb

wo jalwa-e-KHayal ki duniya kahen jise

kuchh kam-nigahiyan hain tajalli ki aaD se

aisi bhi ek nigah-e-tamasha kahen jise

tanhai-e-KHayal se 'tabish' ye haal hai

aisa koi nahin ki hum apna kahen jise