sab ki aankhon mein raha karte the

sab kī āñkhoñ meñ rahā karte the

fard haiñ qaum huā karte the

ab ta.alluq meñ ġharaz hai shāmil

dost bachpan meñ huā karte the

rāste taal talaiyā Tiile

kitne rūmān huā karte the

us kā ḳhush honā bahut bhātā thā

ham nishāne ko ḳhatā karte the

ishq parvān vahāñ chaḌhtā thā

jahāñ aaseb rahā karte the

haath to ab bhī milāte haiñ log

dil magar pahle milā karte the

dast bardārī hameñ aatī thī

ham kahā maan liyā karte the

kar liyā ḳhud ko hī barbād āḳhir

vaqt barbād kiyā karte the

pahle āñkhoñ ko mayassar the aap

pahle ham sher kahā karte the

sab ki aankhon mein raha karte the

fard hain qaum hua karte the

ab talluq mein gharaz hai shamil

dost bachpan mein hua karte the

raste tal talaiya Tile

kitne ruman hua karte the

us ka KHush hona bahut bhata tha

hum nishane ko KHata karte the

ishq parwan wahan chaDhta tha

jahan aaseb raha karte the

hath to ab bhi milate hain log

dil magar pahle mila karte the

dast bardari hamein aati thi

hum kaha man liya karte the

kar liya KHud ko hi barbaad aaKHir

waqt barbaad kiya karte the

pahle aankhon ko mayassar the aap

pahle hum sher kaha karte the